O PREGÓN D'AS FIESTAS
Leyendo a pachina web oficial d’as Fiestas d’o Pilar d’iste anyo, m’he trobau con o pregón que leyerán Amaral o diya 7 d’otubre y no m’he resistiu a reproducir-lo per o suyo conteniu, y perque, en a suya versión castellana, rematan chilando Entalto Aragón! Ya yera hora de que quedasen dezaga ixos tiempos en los que o pregón lo leyeba o Director Cheneral de RTVE. As fiestas han d’estar populars y sentidas per totz y parixe que iste pregón d’Amaral lo aconsigue transmitir.
¡Manyos y manyas! ¡Aragoneses! ¡Amigos plegaus dende a resta d’Espanya y d’o Mundo!
Ye ta nusatros una gran honor dar comienzo a las Fiestas d’o Pilar d’iste 2006.
Nunca no nos prexinemos que dos zagals d’as Delicias y Casablanca iban a puyar un diya a ista balconada, sólo que per fer cancions y tocar a guitarra. Dende que saliemos d’os nuestros bicos hemos recorriu meyo mundo, hemos teniu muito tiempo t’anyorar una ciudat y unas carreras que conoixemos de memoria. Hemos chetau de menos o nuestro quiesto acento manyo y tamién o cierzo d’o que dicen nos torna barrenaus y obstinaus.
Hemos extrañau un puesto que nos ha marcau ta cutio y hemos explanicau con argüello, una y mil vegadas, dende Mexico dica Chile, que somos d’una ciudat d’o Nordeste d’Espanya, dura y polida, cruce de camins y culturas clamada Zaragoza. En iste puesto ye a nuestra vida, as nuestras parentallas, amigos y o nuestro corazón.
Son estaus masiaus anyos sin poder vivir as fiestas d’o Pilar, venindo a tocar ta marchar-nos a o diya venién. Iste anyo va a estar esferent, imos a estar astí abaixo con vusatros ta quedar-nos toda la nueit en a carrera y os diyas que continan.
En ista balconada soz totz, verdadero esmo d’as fiestas. Os manyos y manyas de cualsiquier condición social, orientación sexual y traza de pensar. Totz, siga cual siga la suya color de piel, los que naixión en Zaragoza y los que plegón de luen buscando una vida millor, fuyindo d’a pobreza u a inchusticia en os suyos países d’orichen. No podemos ni debemos xublidar, que un diya os pais y lolos de muitos de nusatros tenión que dixar Aragón ta buscar un horizonte que en a nuestra tierra no se vislumbraba.
Aquí son totz os mosicos de Zaragoza y totz os que "lo tienen crudo" ta salir entadebán diya a diya y queremos aprobeitar ta demandar a o nuestro conceller y a la resta d’o consistorio, que se dixen a piel ta fer de Zaragtoza un puesto más chusto ta vivir, que esfiendan tamién os nuestros parques, as riberas d’os nuestros ríos y a nuestra identidat.
En istos diyas de borina brindaremos per un futuro millor y tamién per un pasau y una cultura que no debemos xublidar, brindaremos per os amigos ausentes y brindaremos ta demostrar que ista ciudat, amás d’estar inmortal ye plena de vida.
¡Entalto Zaragoza! ¡Entalto as fiestas d’o Pilar! ¡Entalto Aragón!
AMARAL
